STENUIT
O 24 de outubro de 1702 a poderosa frota que viña de América fuxindo da rapina do corsario inglés, cargada de ouro e de prata para a Coroa de España, foi asaltada no interior da ría de Vigo e afundidos os seus corenta navíos entre o estreito de Rande e a illa de San Simón. Unha batalla feroz. A frota hispanofrancesa contra as rápidas naves inimigas.
Dende aquela moitos buscan aínda o tesouro dos vellos galeóns. Del falaron Xulio Verne, Borrow, o Padre Feijoo... ``Era a frota máis rica que ninguén recorda dacabalo das ondas´´, di un cronista da época.
¿Qué se perdeu e que se logrou salvar de todo aquilo? Había tres anos que non viña das Indias nin unha peza de ouro nin unha onza de prata.
Robert Sténuit, xornalista e arqueólogo, narra neste libro a aventura e os traballos da última expedición que en 1956, cos medios máis adiantados do seu tempo, veu procurar nestes fondos lamacentos o segredo do Santo Cristo de Maracaibo, a espléndida nau capitana. Localizaron os navíos, levantaron os restos, armaron os seus campamentos á beira da ría...
